BOGOTA (AP).- Sinku militar i kuater sivil, tur ku trahenan kamuflá bistí i ku armanan, a keda kapturá ora nan tabata move riba un karetera ku kahanan ku un total di 603 kilo di kokaina, asina outoridatnan a informá ayera.
No ta e promé kaso den kua militarnan di rango abou ta keda sorprendé transportando droganan ilegal den e pais aki, konsiderá komo un di e prinsipal produktornan di kokaina na nivel mundial.
E vehíkulo den kua e nuebe hòmbernan tabata move ku e droga, empaketá den kahanan, a keda pará na un puesto militar na Mutatá pasobra vários siman pasá outoridatnan tabatin datonan di informantenan i inteligensia ku via e kaminda ei trafikantenan tabata trafiká, asina koronèl Saulo Vicente Daza, a bisa.
Daza a bisa ku ningun di e detenidonan a bisa ni na kua banda nan ta pertenesé ni unda nan tabata bai, ounke ta sospechá ku nan a bin for di Medellin, kapital di Antioquia, direkshon e haf di Turbo, riba Pasífiko, ku e meta di saka e droga for di e pais via di laman.
Fiskalia General a bisa ku e nuebe hòmbernan ‘tin vínkulonan’ ku e banda Los Urabeños, integrá pa narkotrafikantenan i èks paramilitarnan ku a bolbe arma nan mes.
Fiskalia a bisa ku ademas di e droga, outoridatnan a konfiská ocho rifel, un pistol outomátiko i prendanan di uso militar.
