BENI, CONGO (AFP).- Un grupo di 25 militar akusá di “a hui pa enemigu” durante peleanan resien kontra di rebeldenan di M23 a keda kondená na morto na Repúblika Demokrátiko di Congo, segun nan abogadonan a informá.
En total 31 persona (27 militar i 4 muhé sivil, kasá di militarnan) a komparesé dilanti e tribunal militar di Butembo, den e provinsia di Kevin Nort. Nan a enfrentá akusashon di “a hui pa enemigu”, “violá òrdunan” i “robo”, segun Jules Muveko, un dje abogadonan defensor. Na final dje oudiensia, “25 militar, inkluso dos kapitan a keda kondená na morto”, segun Muvweko, kende a anunsiá e intenshon pa apelá e sentensianan. E sobrá akusadonan a keda apsolvé pa falta di prueba.
E pais den luna di mart último a trese bèk kastigu di morto despues di un moratorio vigente for di 2003.
For di kabamentu di siman pasá, e organisashon rebelde “Movementu 23 di mart” a tuma kontròl den vários pueblo.
M23, un grupo di kua mayoria miembro ta tutsi, último añanan a poderá di ekstenshonnan grandi dje teritorio kongoles, provokando kantidat grandi di morto i hendenan ku a hui.
Congo ta akusá Ruanda di ta respaldá M23, loke ku Kigali ta nenga.
E parti ost di Congo, riku na mineral, ta esenario di kombate pa 30 aña kaba entre gruponan armá lokal i estranhero.
