WILLEMSTAD.- Ayera tardi durante dje rueda di prensa di Gobièrnu Minister di

Enseñansa, Siensia, Kultura i Deporte, sr. Steven Croes a anunsiá ku Festival di Tumba 2021 ta tuma lugá pero na un manera responsabel.

Durante di su diskurso Minister Croes a kuminsá na splika ku e sektor di farándula a wòrdu afektá hopi pa COVID-19, pero Gobièrnu i AMAK ke trese un kambio.

Gobièrnu ke drenta un etapa nobo ku farándula i ku introdukshon di un protokòl nobo pa por guia e organisadónan di e evento pa kumpli ku prekoushon nesesario i na un manera responsabel.

Gobièrnu ku AMAK ta presentá Tumba 2021, pero den un forma adaptá pa kumpli ku e medidanan di prekoushon.

KONDISHONNAN

Pa por sigurá ku e evento ta kana na un manera korekto, Gobièrnu a pone algun kondishon. Públiko lo por sigui e evento via di medionan, transmishon di televishon i radionan. Lo no tin aktividat pa públiko den Festival Center. No por tin mas ku 32 músiko pareu riba stage i e evento kompletu lo keda manehá pa un tim rekonosé di ‘crowd management’ ku lo mester presentá un plan di maneho dje evento promé ku esaki tuma lugá. E aktividat no mag di kaba mas lat ku 12 or di anochi.

Minister Croes a indiká ku Gobièrnu di su banda a komprometé finansieramente, no solamente pa yama danki, pero tambe paso esaki ta e di 50 aña di Festival di Tumba na Kòrsou. Finalmente Minister Croes a informá tambe ku e músikonan lo no mester pasa un PCR test pa por partisipá na e evento.