KRALENDIJK – Sea ke òf no ke, tur kos ta indiká ku e siman aki e kasonan positivo di Covid-19 lo oumentá den forma drástiko na Boneiru, despues di e fin di siman festivo di kambio di aña. Na vários lugá tabatin aglomerashon di hende den selebrashon. Hende pegá riba otro, ta balia ku otro, sin tapaboka. Ta teme lo pió.

E diferensia entre e sifranan aktivo di djasabra i ayera ta duna kaba un indikashon kiko por bai spera e siman aki. E publikashon diario di Departamentu di Salubridat ta mustra ku djasabra tabatin ainda 188 kaso aktivo, miéntras ku ayera a bula atrobe 200 kaso aktivo. 238 Kaso pa ta presis, un oumento di 59 kaso aktivo for di 95 tèst ku a hasi.

Na vários sitio tabatin aglomerashon deskontrolá di hende fin di siman. Polis tabata riba kaya, pero no por a hasi masha kos na e situashon na e sitionan di aglomerashon, manera Centrumgebied Kralendijk, na vários punto riba Malekon i otro sitionan.

Bon ta ku a sera Seru Largu den forma hermétiko pa evitá konsentrashon di hende. No por a yega ku outo riba e seru aki, un lugá gustá pa mira vürwèrk riba Boneiru, sende vürwèrk i selebrá.

Remarkabel ta ku mayoria hende a aploudí e desishon aki. Djis algun hende tabata kontra, mirando e komentarionan riba media sosial.

No tin duda ku outoridatnan di salubridat ta teniendo kuenta tambe ku oumento drástiko di kasonan positivo di Covid-19 e siman aki. Bon sí ta ku te ku ayera tabatin solamente 3 persona hospitalisá, loke ta indiká ku e síntomanan awor ta ménos severo, loke ta kuadra tambe ku e variante di Omicron ku a yega Boneiru siman pasá. Ademas hopi hende ta bakuná, alrededor di sinku mil persona asta ku e di tres bakuna, esta e ‘booster’.

Departamentu di Salubridat Públiko ta keda insistí pa personanan ku tin keho relatá na Covid-19 keda kas, no bai traha i yama 0800 – 0800.

Ta importante pa ora bo tin keho bai tèst. Importante ta pa keda warda den karentena. No sali pa bo no kontagiá otro persona. Pa baha e sifra di kontagio ta importante pa mantené e reglanan di higiena. Tene 1,5 meter distansia i laba man ku awa i habon pa evitá kontagio ku e vírùs di corona.

Bo tin keintura, doló di garganta òf kualke otro síntoma relatá na Covid-19? Keda bo kas i yama 0800-0800. Mantené e instrukshonnan di higiena. Kome salú, drumi sufisiente i move regular pa hisa bo resistensia. Kuida bo mes i esnan rònt di bo.