NEW YORK, MERKA.- E konkurso ‘Miss America’ a anunsiá djamars e eliminashon di e desfilenan di trahe di baño (bikini) i a indiká ku nan lo no husga mas e aparensia físiko di e konkursantenan, esaki a base dje movementu #MeToo ku ta kuestioná e tipo di eventonan aki.
E próksimo edishon dje konkurso ku ta tuma lugá den sèptèmber ‘e trahenan di baño lo wòrdu eliminá’, asina e organisashon a anunsiá via di un komunikado.
Na lugá di realisá e desfile ku tabata representá 10% di e puntuashon final, kada un dje 51 konkursantenan lo partisipá den un seshon interaktivo ku e huesnan kaminda nan lo dialogá riba nan logronan, metanan i kon usa nan talento, pashon i ambishon pa realisá e trabou di ‘Miss America’.
E konkursantenan lo no kompetí mas tampoko den trahe di gala, un sekshon ku tabata representá 15% di puntuashon final, pa esaki nan lo por bisti un paña ku segun nan lo ta mas kómodo i ku ta ekspresá nan personalidat.
‘No no ta un konkurso di beyesa mas’, asina Gretchen Carlson, presidente di ‘Miss America’ i ganadó dje título na 1989, a anunsiá durante di un entrevista na kanal di televishon ABC, ‘Nos ta un kompetensia’.
‘Nos a skucha hopi damita bisa ku nan ta enkantá di ta parti di nos programa, pero nos no ke ta bistí den un trahe di baño ku sapatu haltu, awor nos lo no tin esaki mas’, Carlson a ekspresá.
#MeToo, a nase despues di e skandal kaminda mas ku 100 dama a hasi akusashon di akoso seksual, agreshon seksual i violashon kontra di e eks produktor di Hollywood, Harvey Weinstein, a pone yen hòmber poderoso den vários industria pèrdè posishon i provoká un reflekshon mundial riba seksualismo i akoso seksual na trabou.
Carlson a keda designá komo presidente dje organisashon di Miss America, esaki despues dje despedida forsa di Sam Haskell na final di 2017. Un investigashon di ‘Hufftington Post’ a publiká vários mensahe di e-mail kaminda Haskell ta hasi bofon di aparensia, intelektual i bida seksual di konkursantenan, spesialmente di e ganadó di 2013, Mallory Hagan i tambe Carlson.
‘Miss America’ ku ta kumpli 100 aña na 2021, ta keda transmití na ABC dia 9 di sèptèmber próksimo.