WILLEMSTAD.- Miss Earth Curaçao 2018, Alexandra Atalita for di dia 3 di òktober último ta na Manila, Filipina, kaminda e ta kompitiendo pa e título di Miss Earth 2018.  Pues en total e tin 2 siman kaba na Manila. Un total di 89 partisipante ta formando parti dje sertámen e aña aki.
Durante  e aktividatnan ku e partisipantenan di e sertámen Miss Earth a partisipá aden, tabatin bishita na diferente skol, konferensia di prensa,  kompetensia di trahe nashonal, ‘resort  wear competition’ i tambe ‘Long Gown Competition’. Un dje kompetensia ei tabata Beauty of Face and Poise, kaminda  e kandidatanan mester a presentá sin makiahe.
Dia 19 di òktober awor, Alexandra Atalita ku ta forma parti di Fire Group, lo tin kompetensia di trahe di baño, miéntras ku dia 22 tin kompetensia di talento.
T’asina ku e partisipantenan a keda repartí den tres grupo, esta  Fire, Air i Water Group. Alexandra Atalita ta formando parti di Fire Group.
Alexandra Atalita na e momentunan aki ta fungiendo komo un tremendo embahador di Kòrsou, kaminda e ta representando nos pais na un manera digno.
E final di Miss Earth ta dia 3 di novèmber na Mall of Asia Arena.  Alexandra ta sigur ku e lo hasi su bèst pa saka kara di Kòrsou.