WILLEMSTAD.- Djabièrnè 18 di òktober último, e partisipantenan na Miss Teen Curaçao International 2019, Davica Demali, Shaqira Noor, Loeshemalies Basilia, Giannelly Koeijers, Marlusha Americaan, Ashanty Crispulo i Giorliana Veld huntu ku direktiva di Curaçao International Crowned Queens Foundations i sra. Ruth de Lanoy ku tin na su enkargo e parti edukashonal di e partisipantenan, a klousurá e temporada ku un sena di gala opsekio di Oporto Restaurant na Riffort Village. Tabata un anochi ameno kaminda e partisipantenan por a interkambiá ku otro.
Partisipantenan i direktiva por mira bèk riba un temporada di preparashon eksitoso di e promé edishon di e kompetensia “ Miss Teen Curaçao International 2019”. Preparashonnan ta kanando pa e fase final ku ta djaweps 24 di òktober 2019, kaminda partisipantenan lo tin kòmbersashon ku hurado i presentashon dilanti un kuerpo di hurado di nan proyekto pa komunidat dediká e aña aki na konsientisashon di kanser di pechu i e trabounan balioso di Fundashon Sinta Ros.
Elekshon Final “Welcome to Curaçao”, ta djasabra próksimo dia 26 di òktober na Santa Barbara Resort di 8 or pa 11 or di anochi. Riba e dia aki lo skohe: Miss Teen Curaçao International (Miss Teen Mundial) 2020, Miss Teen Universe Curaçao 2021, Miss Teen Americas  Curaçao 2020 i Miss Teen Grand Curaçao International 2020.
Karchi ta optenibel serka partisipantenan i serka sra. Christy Dania, na ofisina di Curaçao International Crowned Queens Foundation na Rooseveltweg 105-105D, edifisio ariba di edifisio di Highlights, telefòn 681-4390.