KRALENDIJK.- Prensa internashonal ta konsiderá morto di e dòkter Fiona Sharp bou di laman na Boneiru komo UNU rondoná pa misterio. Mail Online, un publikashon riba Internèt, a skirbi ayera asta ku titular grandi: "Mystery surrounds the death of a doctor, 52, who was found unconscious 25m below the surface during the final scuba dive of her Caribbean holiday."

Den un artíkulo separá Extra ta elaborá mas ekstenso riba e asuntu aki, ku ta hañando hopi atenshon den prensa internashonal, siendo ku na Boneiru mes polis na promé instante no a suministrá ningun informashon tokante e morto di Fiona Sharp. Esaki ta lanta interogante. For di djasabra kaba ta saliendo informashon tokante morto di dòkter Fiona Sharp riba Internèt, teniendo kuenta tambe ku ta trata di un dòkter hopi famoso.

No krimen

Riba pregunta di Extra e bosero di polis a kontestá ayera ku enbèrdat dia 17 di òktober alrededor di 11.45 di mainta a drenta notifikashon di un sambuyadó femenino ku lo mester ta drif den bisindario di Buddy Dive. Na yegada di polis i ambulans a konstatá ku e persona aki a fayesé kaba. Dòkter a konfirmá esaki i a base di su kontròl. Pues no ta trata di un krímen. Dr. Fiona Sharp, e víktima pues, tabata un anestesista di gran reputashon na West-Oustralia. Segun otro medio di prensa riba Internèt, Fiona Sharp a muri na Boneiru miéntras ku e tabata sambuyá. "Kiko a pasa eksaktamente no por bisa ainda. Pero Fiona Sharp a kaba di finalisá un fin di siman di sambuyamentu na Boneiru i tabata hasiendo un último buseo den un grupo, ora ku algu a bai teribel robes", segun fuentenan notisiero na Oustralia ta duna di konosé. Dr.Sharp durante su último buseo tabatin un asina yamá ‘rebreather’ bistí, pero no ta konosí kiko eksaktamente a kousa su morto. Nan a haña e dama di 55 aña 25 meter bou di awa i no tabata reakshoná i no a logra reanim’é.

Fenomenal

"Lo keda kòrd’é komo un hende muhé sinsero i fenomenal". Asina su famia ta deklará.“Bou di awa e tabata sinti su mes felis,” su famia na Oustralia ta deklará.

Nan ta deskribí Sharp komo un ruman muhé sinsero i un tanta stimá, ku tabata stimá pa keda den kondishon i aktivo. Na su pais e tabata un anestesista di gran reputashon, kende tabata spesialisá den medisina hiperbáriko. Medisina hiperbáriko ta un tratamentu médiko den kua ta hasi uso di preshon atmosfériko mas grandi ku na nivel di laman pa duna sierto tratamentu. E tratamentu ta enserá uso di terapia di oksígeno hiperbáriko (THOB) i rekompreshon terapéutiko pa e malesa di dekompreshon. E intenshon ta pa sistemátikamente redusí e efektonan dañino di blasnan di aire dor di redusí físikamente nan tamaño i krea mihó kondishon pa saka e blasnan e e ekseso di aire.

Dr.Sharp tabata traha na e Unidat di medisina hiperbáriko di Fiona Stanley Hospital i tabata un eksperto den emergensia bou di awa pa skolnan di buseo lokal. “Fiona tabata un di e personanan mas maravioso ku bo bo por a topa”, Lee Johnson, gerente general di Perth Scuba, a bisa den un deklarashon. “Nos tur a keda di shòk i inmensamente tristu ku e notisia”. Na e momentunan akí famia di dr. Sharp ta trahando huntu ku Dive Alert Network pa manda e restunan di dr. Sharp bèk pa Perth, Oustralia. Den e esaki nan ta hañando asistensia konsular di e Departamentu di Relashonnan Eksterior oustraliano.