LA PAZ, AP.- Presidente Evo Morales a selebrá 12 aña di gobièrnu, ku kresementu di e ekonomia boliviano, pero meimei di un kaida franko di su popularidat i di protestanan pa su intenshon di buska un reelekshon nobo den e nashon andino.
Morales a dediká su informe, resaltando e kresementu di 4,3% ku e ekonomia a registrá aña pasa i ku segun gobièrnu tabata esun mas importante den Suramérika.
E gobièrnu a resaltá un disminushon di pobresa ekstremo, destakando ku esaki a redusí di 38% na 2005 pa 17% na 2017.
“presidente Evo Morales a dediká na duna sifra i no splika òf hasi un análisis di e ekonomia”, asina e analisá Alberto Bonadona a kuestioná den deklarashonnan di televishon lokal. E ta profesor di e Universidat estatal Mayor de San Andres. “E no a atendé e tema sosial, e no a nombra protestanan n nada ku ta afektá su gobièrnu”, asina el a agregá.
Morales a yega na poder na aña 2006. Na 2014, den su terser postulashon pa presidensia, e lider sosialista a gana ku 64% di voto, i posiblemente e por buska un reelekshon nobo den elekshon di 2019.
