MERKA.- Morgan Freeman lo risibí e galardon di  honor di e Sindikato di Aktornan di Hollywood, S.A.G. komo rekonosementu pa su trayektoria den e mundu artístiko.
Ayera e organisashon S.A.G a informá den un komunikado ku e galardon spesial pa Freeman lo forma parti di e di 24 edishon di premionan dje Sindikato di Aktornan ku lo tuma lugá dia 21 di yanüari próksimo.
‘Algun aktor ta pasa tur nan biba sperando riba e ròl perfekto. Morgan a mustra nos ku e berdadero perfekshon ta loke e artista aportá na e papel’, asina e presidente di SAG, Gabrielle Carteris a bisa ayera.
El a indiká mas leu ku sea komo shofùr, asesino kondená, asistente di gym di bòkseo o komo presidente, semper Freeman a deskubrí e ‘alma’ i ‘ personalidat’ di tur su personahenan.
Ganadó di un Oscar pa ‘Million Dollar Baby’ i nominá na 4 otro okashon, Freeman ta un dje aktornan mas respetá i atmirá di su generashon.
Freeman lo uni su mes na e lista di artistanan premiá pa e Sindikato di Aktornan pa nan rekonosementu na nan briante karera, entre otro e ganadó di aña pasá Lily Tomlin, Debbie Reynolds, Rita Moreno, Dick van Dyke, Betty White, Julie Andrews, Clint Eastwood i Sidney Poitier.