WILLEMSTAD.- E frekuensia 94.5 FM a haña nòmber i maneho nobo. Entrante awe, 3 di yanüari e emisora lo yama ‘LEGRIA 94.5 FM bou di maneho di popular Morgan Isenia.

Morgan Isenia tin un trayektoria amplio den media na Kòrsou i hopi eksperensia i konosementu den e mundu di radio.

For di promé di dezèmber preparashonnan a start pa presentá Kòrsou un radio emisora di kalidat haltu i diferente. ‘LEGRIA 94.5 FM lo ta un ‘feel good’ radio kaminda kada ken ku drenta den sintonia lo por disfrutá di bon muzik i programashon na nivel. ‘LEGRIA 94.5 FM lo konsentrá primeramente hopi muzik, kombiná ku blòkenan kòrtiku di notisia i informashon.

‘E idea ta pa e oyentenan por distraí nan mente den un ambiente positivo i dushi. Sali un ratu for di tantu notisia negativo ku ta bin riba nos tur dia’, asina Morgan Isenia ta splika.

‘LEGRIA 94.5 FM lo konsentrá riba e kalidat i komo tal lo no start ku hopi programa ‘live’. Aparte di ‘Morgan Mainta!’ ku lo ta ‘live’, e úniko programa nobo ku tambe lo ta bibu ta “Rafaga 1000!” presentá tur atardi den siman entre 5 pa 7pm pa popular Ramil Cicilia.

“Rafaga 1000!” lo ta orkan musikal masha dushi mes kargá ku ambiente i energia positivo pa freska kabes i disfrutá un poko ora sali trabou. Mainta lo keda na enkargo di Morgan Isenia ku su ‘side kick’ Tony Castro ku ta manda ambiente musikal dushi tur mainta entre 6 pa 9am pa start bo dia bon.

Entre 12 pa 2pm di mèrdia, ‘LEGRIA 94.5 FM lo tin hopi músika klásiko ku bo tin ratu sin tende den ‘945 Classics’.

E idea ta pa den futuro bin ku mas programa i ideanan ‘trendy’ na nivel pa krea un radio di kalidat haltu. For di awor tur hende por bishitá www.945legria.com i tambe riba retnan sosial manera Facebook i Instagram ya bo por sinti e vibrashon dushi di 945 ‘LEGRIA FM.