WILLEMSTAD.- Djaweps mainta, e popular programa di radio “Morgan Mainta!” lo ta ‘live’ for di Seru Fortuna.
Fo’i mitar di shete, tur esnan ku ta skucha i wak, por disfrutá di e programa ku komo invitado spesial Francis Sling.
Resientemente e hóben artista yu di Kòrsou, Francis Sling a lansa un piesa nobo titulá “3 o’clock Romance”. Francis Sling ta konosí tambe pa su arte di pintura sumamente bunita.
Un di e obranan mas resien di Francis, ta e edifisio den Skalo (kaminda ántes tabata D.A.R.E.), ku e gran artista a duna un bachi masha bunita i úniko. Aparte di pinta, Francis ta traha muzik tambe di un forma masha original.
Den e afan pa pone mas lus riba kosnan positivo i nos mes hendenan, “Morgan Mainta!” lo ta bou di palu di mespel, den kurá di Sling riba djaweps mainta.
Aparte di skucha e programa via CNR 88.9 FM, lo por mira e show tambe ‘live’ riba e página Facebook di Morgan Isenia.
Definitivamente ta bai bira otro mainta dushi i original, ora Morgan Isenia, Yves Cooper i Francis Sling topa otro bou palu den Seru Fortuna. Den futuro lo por sigui spera mas moveshon riba kaya di e tremendo show “Morgan Mainta!”.