WILLEMSTAD.– Despues di un periodo kòrtiku fo’i aire, e popular programa di radio “Morgan Mainta!” ta ranka sali djaweps 17 di ougùstùs riba CNR 88.9 FM. Debí ku partidonan no a logra yega na otro, Morgan Isenia i TCFM no a renobá e akuerdo pa kontinuashon di “Morgan Mainta!” riba e emisora.
E konsepto pa produsí i presentá un programa musikal, ku ta vibra un positivismo enorme pa habri bo dia, a resultá un éksito sin mas. Mas i mas oyente ta buska i skohé pa habri na dia skuchando programanan mas positivo, na lugá di e tantísimo programanan di notisia, ku hopi kos negativo i zundramentu mainta tempran riba radio. Definitivamente, e variashon musikal, kombiná ku informashon i e estilo úniko i profeshonal den presentashon radial di Morgan Isenia, tabata i ta e ingredientenan klave ku a hasi “Morgan Mainta!” un dje shownan musikal ku mas sintonia na radio mainta.
Segun e lokutor, tabatin vários opshon riba mesa, pa kontinuashon di programa, sinembargo el a skohé pa formulá ku lo mester garantisá tantu kontinuashon di show riba término largu, komo e posibilidat pa tin su libertat kreativo den produkshon, presentashon i inovashon dje show. Komo produktor i presentadó, semper Morgan a sa di keda mehorá i inová su mes den mundu di radio i televishon.
P’esei mes for di djaweps 17 di ougùstùs, “Morgan Mainta!” ta start riba CNR 88.9 FM, pero lo por bai skucha i mira e show “online” tambe via diferente medio, entre otro TuneIn, BasillaChill, Facebook i su propio wèpsait www.morgan-online.com  Pues kuminsando riba e promé dia di skol, tur hende ku kier habri nan dia den un ambiente ku bon músika, informashon i positivismo riba radio por pone nan radio trankil riba 88.9 FM i disfrutá di un otro programa na nivel i ku un presentashon profeshonal i dushi pa skucha manera semper.