Edishon Di Imprenta

Motosiklista heridá den aksidente i ladronisia na restorant Sunflower

Komparti:

WILLEMSTAD – Dos insidente diferente a eksigí atenshon di polis durante último oranan. Un motorsiklista a resultá heridá den un aksidente di tráfiko na kaminda Hensley Meulens, miéntras ku ladronnan a kibra drenta restorant Sunflower na Groot Davelaar, kaminda nan a hòrta plaka i bebida alkohóliko.

E aksidente a sosodé na altura di Ricardustehuis, kaminda un motosiklista tabata pasando na momento ku un pikòp Toyota Hilux blanku a hasi un maniobra pa drenta un kaya. Segun informashon ku EXTRA a risibí, e shofùr di e pikòp a hasi un U-turn pa subi e kaminda bek, pero durante e maniobra e motosiklista a pasa i a dal kontra e pikòp.

E motosiklista a kai riba kaya i tabata keha di doló na su pia i hep. Personal di ambulans a presentá na e sitio pa duna promé asistensia na e herido, despues di kua nan a transport'é pa Curaçao Medical Center (CMC) pa mas tratamentu. E motosaikel a sufri daño, miéntras ku e pikòp a keda ku daño na su parti dilanti.

Ladronisia na Sunflower

Den un otro insidente, ladronnan a kibra drenta restorant Sunflower na Groot Davelaar durante oranan di mardugá. Segun informashon ku EXTRA a risibí, e ladronnan a logra drenta e restorant i a hòrta den un kluis ku tabatin plaka di e benta di dia anterior. E kantidat di plaka hòrtá ta kalkulá na mas o ménos 500 florin. Ademas, e ladronnan a bai ku algun bòter di bebida alkohóliko. Polis a ser informá di e ladronisia i ta investigando e kaso. Te na e momentu aki no tin informashon tokante detenshon di sospechosonan.

Artíkulonan relashoná

Laga un komentario