WILLEMSTAD.- Mouris Maria, mihó konosí komo Mou, a nase dia 9 di ougùstùs 1952 na Kòrsou. Su karera deportivo ta partí den 3 kategoria, kual nan ta: deportista, dirigente tékniko i narador/komentarista di weganan di futbòl.
Mou a hasi su debut den e ekipo di Vesta, sigui despues pa Centro Dominguito, Veendam i despues a regresá Centro Dominguito kaminda el a finalisá su karera komo futbolista aktivo. Su posishonnan riba vèlt tabata promé, den hubenil, komo delantero, despues el a move den bolante i e último tres añanan den defensa.

...Mou den selekshon di Antia Hubenil ku a gana medaya di plata den Weganan di Reino 1971 na Hulanda...

1. Deportista:
Mou a kuminsá hunga bala for di aña 1962 den e ekipo di Vesta i a pasa den e kategorianan welpen, aspirant i junior. Na aña 1971 Mou a bai e ekipo di Centro Dominguito. Dos aña despues el a hunga dos wega internashonal ku Centro Dominguito kontra di e ekipo venezolano Valencia, weganan ku a finalisá den empate di 0-0 i 1-1.
Na aña 1974 Mou a bai Veendam i den ougùstùs di mesun aña ku e ekipo aki bou di direkshon di Stanley De Lannoy a partisipá den un torneo internashonal na Táchira, Venezuela. Den e wega final Veendam a gana Deportivo San Cristóbal (team profeshonal di Táchira) na pinalti i gana e trofeo di e torneo. Mas aleu Mou a hunga den e promé kampionato ofisial di futbòl semi profeshonal na Kòrsou ku a kuminsá den sèptèmber 1974. El a hasi esei ku Veendam ku tabata dirigí pa e gran entrenadó Hubert “Ibi” Janzen. Seguidamente Mou a regresá Centro Dominguito i tabata aktivo ku e ekipo aki te ku aña 1987.
Mas aleu Mou a yega di reforsá Jong Colombia i tambe a hunga 5 wega internashonal amistoso.
Fraternan di Scherpenheuvel tabata traha nan selekshon di luna i tabata duna e hungadónan punto. Tres aña siguí Mou a keda selektá den e selekshon di fraternan. Nan tabata publiká nan den un buki ku tabata hiba e nòmber di DIDI.

...Mou den Selekshon di Kòrsou 1972 ku a gana Magallanes di Chile 2-1...

Ku Selekshon Kòrsou/Antia:
Mou a hunga 18 wega ku selekshon di Antia Hulandes, di kua dies ku selekshon Hubenil i ocho ku selekshon Senior. Na aña 1970 Mou a forma parti di selekshon Hubenil di Antia ku a gana medaya di plata den Weganan di Reino na Kòrsou. Su siguiente aña, 1971, el a bolbe keda konvoká pa selekshon Hubenil ku a ripití ku medaya di plata den Weganan di Reino na Hulanda.
Dos aña despues Mou tabata den selekshon Senior di Antia Hulandes ku dos biaha a gana di Haiti ku skor di 1-0. Mas aleu el a integrá selekshon di Kòrsou den wega internashonal kontra di Magallanes di Chile, partido ku Kòrsou a gana 2-1.
Den aña 1973 Mou un biaha mas e tabata den selekshon antiano pa e Pre-Mundial na Haiti. Mou tabata e hungadó mas hóben di Pre-Mundial.

Logronan komo hungadó:
- MVP di Segunda Divishon.
- 1970 Medaya di plata ku Selekshon Antia den Weganan di Reino na Kòrsou.
-1971 Un biaha mas plata ku Selekshon Antia den Weganan di Reino na Hulanda.
- 1974 Kampion ku Veendam den Torneo Internashonal na Táchira, Venezuela.

 ...Mou komo hungadó di Veendam...

2. Dirigente tékniko:
For di 1978 Mou a kuminsá sigui tur kurso di entrenadó ku a wòrdu duná na Kòrsou. Spesial kursonan pa e sekshon hubenil e tin diploma di O.D.E.P. i tambe di O.D.I.L.A.C., ku ta kursonan ku a keda duná na México i otro pa un periodo di seis luna na Falcón, Venezuela. Na Kòrsou tambe Mou a logra hopi diploma, di kua esun mas haltu ta TC 3.
Siendo hungadó di Centro Dominguito den promé divishon, Mou tabata trainer di e ekipo Vasco Da Gama ku tabata militá den e di dos divishon. Ofisial na aña 1988 Mou a bira asistente di Ronnie Trouwloon di Centro Dominguito. Pa loke ta promé divishon, na aña 1989 Mou a ser nombrá entrenadó di Centro Dominguito. El a yega di train e siguiente ekiponan: Vasco Da Gama, Centro Dominguito, SUBT, Sithoc, Undeba i Jong Colombia.

Na Sedreko:
Mou a kuminsá traha na aña 1975 na Sedreko. El a traha den diferente bario, e.o. Fuik, Montaña, Kintjan, Rancho, Marchena, Mahuma, Tera Cora, Sta. Cruz, Barber, Willibrordus, Westpunt. Parti mainta Mou tabata laborá na skol, e.o. Sint Antonius, Getruida Kroon, Van Houten, pero tambe na internatnan manera Kas Minita, GOG, Huize Sint Jozef, Huize Rose Pelitie.
Mou a lanta deporte den bario. E tabata na Soccer Academy School tambe i e tabata kordinadó pa e selekshon di futbòl pa e proyekto AJB.
Na aña 2012 Mou a baha ku penshun.

Logronan komo dirigente tékniko:
- 1999 Kampion di Antia ku Sithoc.
- 2000 Kampion di Kòrsou ku Jong Colombia.
- Kampion ku Selekshon U-16 ORFIC na Venezuela.

3. Lokutor/Komentarista:
Na aña 1992 Mou a kuminsá huntu ku Robin Visser, Luis Philips, Frank Rosina, Edsel “El Gitano” Evertsz na Radio Hoyer 1010. Na aña 1993 Mou a nara su promé wega ku a bai entre Jong Colombia i SUBT.

Rekonosementu risibí:
- 2012 Homenahe di Sedreko.
- 2017 Homenahe komo baluarte di futbòl dor di FFK.

...Homenahe na e.o. Mou Maria (d) komo baluarte di futbòl dor di FFK...