WILLEMSTAD.- Manera ta konosí “Move Tur Montaña” ta título di e promé kantika di Shamiro Anita, ku a bira tòp 1 den músika i ku ketu bai ta bendishonando hopi hende. Awor a yega e momentu ku Shamiro Anita ta bai lansa su promé buki titulá “Move Every Mountain”.
Den bida tin dia trankil i tin dia duru ku ta pone bo na bo rudianan. Den su buki nobo Shamiro ta splika kon pa surpasá momentunan duru i difísil den bida ku fe i speransa den Dios. Ta trata di un buki skibi na Ingles ku tin komo suptítulo “Overcoming 15 of Life’s Toughest Challenges”. Ta premirá ku e buki aki tambe lo bai yuda i bendishoná hopi hende.
Estreno i debut di e tremendo buki aki lo tuma lugá djasabra, 11 di ougùstùs 2018  den SAMBIL su Event Hall di 7’or pa 9.30 di anochi. Shamiro i otro oradornan lo lesa i splika algun di e partinan mas impaktante di e buki. Tur esaki lo tuma lugá den un ambiente dushi bendishoná ku kanto, baile i presentashon di otro artistanan invitá. Henter pueblo ta invitá i entrada ta grátis. Por spera un sala yen yen, p’esei ta importante pa registrá for di awor si bo ta bai e evento aki i pa yega trempan, paso e sala ta limitá. Por registrá i/òf bestèl e buki via whatsapp 5622233, email info@shamiromusic.com òf www.facebook.com/shamiromusic

Shamiro su meta prinsipal ta pa sigui impaktá mas i mas hende ku mensahenan positivo, prinsipalmente ku e palabra di Dios, pa medio di su kantikanan i awor pa medio di su buki tambe. E buki nobo aki ta konsistí di 16 kapítulo ku lo enkurashá tur ku les’e pa solushoná i surpasá problema i/òf situashon difísil.
Dia 11 ougùstùs por kumpra e buki aki den Sambil i laga Shamiro firm’e. Despues por kumpr’é na librerianan na Kòrsou òf online via Amazon, Kindle, Barnes & Noble, Baker & Taler i Ingram. Pa mas informashon por bishita Shamiro su pagina di Facebook i website òf tuma kontakto via tel/whatsapp.
Shamiro ta gradisí Dios na promé lugá ku ta sigui Move Tur e Montañanan pa e por logra su metanan i ta manda un danki di kurason pa tur hende ta sosten’é.