WILLEMSTAD.- E promotornan dje tremendo ‘Mejor tarde que Nunca Tour’ ku presentashon di Romeo Santos i Prince Royce a anunsiá den e siman aki dos artista mas.
Despues di anunsiá Luis Miguel del Amargue pa e ‘pre-party’ di dia 6 di novèmber awor nan a anunsiá Alex Sensation komo pre-show pa dia 7 i ayera Aria Vega ku lo presentá dia 6 di novèmber.
Pero nan no ta kla ainda, paso falta 1 artista mas segun ‘DEN E BEMBE’ por a komprondé. E artista ku falta lo keda anunsiá mañan djaweps na momentu ku tene apertura di ‘House of Moves’ ku ta ubiká den Winston Churchill Plaza.
Luis Miguel del Amargue nos mester di niun klase di introdukshon na Kòrsou paso e ta un bachatero ku na vários okashon a presentá aki.
Alex Sensation ta nasé na Bogotá, Colombia kende for di chikitu a muda pa Merka. Na edat di 16 aña ela kuminsá toka den diferente nightclub dor di skonde su edat. Ku 17 aña e ta logra un kontrakt den Copacabana nightclub na New York. Djei ela bira dj na radio sigui pa su kolaborashon ku diferente artista urbano, entre otro ku Ozuna. Nan éksito ‘Que Va’ a surpasá miónes di ‘streams’ riba plataformanan digital.
Aria Vega ta un kantante Kolombiano di Barranquilla ku ta meskla ritmonan Afrokaribeño ku músika urbano kontemporeano. El a logra atenshon viral ku ‘Chevere’ un mix popular den kolaborashon ku Ryan Castro.
Pues ta dos artista ku sa kon pone ambiente ta djòin e kartelera musikal ku Moves Entertainment ta bai presentá den e wikènt di 6 i 7 di novèmber próksimo.
Keda pendiente pa djaweps nos tende kua ta e último artista pa subi e lista di presentashon.