ULANDA.- Mr. Ray Bass, un hóben kantante i kompositor, ta lansa su ‘single’ nobo titulá "Monday Break Up". E kansion ta konta un historia di lokual ku a pasa kuné na momentu ku riba un djaluna mainta su relashon ku su èks a terminá.
E kansion ta un Reggae na ingles, alegre i un bon vibra Karibeño di mix ku ta yuda bo prosesá bo relashon ku a terminá. “Pa un temporada mi a kai den un dep. Skibiendo e kansion aki, e la yuda mi ku mi por a sali for di esaki”, Ray ta bisa. Tiki tiki pero sigur Ray a sa di sali for di e dep hasiendo uso di su talento kual ta músika.
Ya pa un temporada kaba Ray ta ‘kind aan huis’ den e teatro P60 na Amstelveen. Akinan Ray a sa di krese i bira un artista di kas ku vários presentashon. Netamente aki ta kaminda ku Ray ta graba e video klep di su kansion ‘Monday Break Up’ ku kolaborashon di P60 Amstelveen, otro músiko nan i e kompania Polariod Benelux ku a sa di kere den su potensia.
“Semper mi a skibi kantika na Papiamentu. Mi soño tabata pa aki na P60 Amstelveen mi kuminsá un karera nobo. Ku e kansion aki Ray ke kuminsá su karera internashonal i asina konkista otro partinan di mundu manera Londen i Hapon.