WOBURN, MASSACHUSETTS, MERKA, AP.- Un hòmber di Massachusetts ta akusá di a hinka un muhé ku tabata studiando den un biblioteka públiko mata. E tabata studiando pa bira dòkter. E atakante ta un persona ku problemanan mental severo, asina su abogado a bisa djaluna.
Jeffrey Yao, di 23 aña, a wòrdu detené sin derechi di fiansa despues di a wòrdu akusá di diferente kargo, entre nan di asesinato, den korte di distrito di Woburn.
Djasabra mainta, Yao a aserká Deane Stryker di 22 aña di patras, i el a hink’é 20 biaha ku un kuchú pa yag di 26 centimeter largu estando den biblioteka públiko di Winchester. Asina fiskal Kate Cimini a indiká. Stryker a wòrdu trasladá pa un hospital kaminda el a muri despues.
“Esaki tabata un atake horibel sin provokashon ku un kuchú kontra un dama hóben den un lugá públiko”, asina Coimini a afirmá den korte i a agregá ku Yao tabatin vários konfrontashon ku polis ántes.
Un hòmber di 77 aña ku kier a yuda Stryker a sufri di un kòrta na su brasa, el a wòrdu atendé i por a bandoná e hospital despues, asina fiskal a afirmá.
Yao a keda sinta trankil, sin mustra emoshon i a keda ketu den korte. Yao i Stryker tabata bishitá e mesun skol sekundario Winchester na mes momentu, ounke Carney a señalá ku nan no tabata konosé otro. E motibu di e atake ta wòrdu investigá.
Stryker tabata alumno di promé aña den Kolegio di medisina Osteopatiko di Universidat di New England i tabata studia pa bira dòkter, asina e presidente di kolegio James Herbert a bisa na Facebook.
