Muhé di poder

Na Memoria di Casandra Altagrasia Martha na bida presidente Fundashon Muhé Uniformá i Armá (MUA)

Muhé di poder

For di chikitu mi tabata sa ku mi ta un muhé poderoso
Mi a siña asta mi pòpchinan pa ta balente
Mi no tabata yaya nan henter dia
Esei ta pa nan sa ku mucha-muhé no por ta mimu
Mi a harpa kurá manera kualke mucha-hòmber.

For di tempran mi a desvelá mi forsa
Mi mayornan semper pará mi tras
Mi rumannan dunando ehèmpel kon ta komportá
Antilliaanse Meisjes Gilde a yuda forma mi identidat
Un muhé di poder mi kera desaroyá.
Un profeshon audas mi a skohe
Un desafio diversifiká, un funshon ku ta eksitá
Pakiko mi mester konformá ku trabou di ofisina?
For di ki dia hende-muhé ta mankaron?

Ta ami ta disidí kua sorto di trabou mi ta traha
Loke hòmber ta hasi, ami por mes bon
Un muhé di poder ta goberná mi kurason
Tantu kontratempu pa mi kumpli ku mi vokashon
Strobami tres aña largu, eksilámi tras di un büró
Mi a persistí, buta pia abou te ora mi a logra.

E kabayero Prinsen a ponemi riba e kabai di bataya
Den un akto noble el a entregámi e spada di guera
Lagami mes abri mi kaminda pa triunfo
Un muhé ku poder kuerpo polisial a atkirí.

Tres muhé so den un grupo di baron a yega tera friu
pa realisá un soño femenista hustifiká
Brasa tur elemento di sorpresa
Stablesé un ehèmpel di emansipashon
Lucha pa mi balor, eksigí mi posishon
Unifòrm polisial pa mi no tabata un novedat
Mi a siña respet'é for den Politie Harmonie
Un muhé di poder a disidí ku ta pueblo e ke sirbi.

Ata awor komunidat ke protehámi
Ta kon un polis-muhé por defendé hende?
Mi estatura chikitu a kaba di koroná obra
Pa kolmo ni arma mi no por a karga
djis pasombra mi ta muhé
Ta te den Korte mi mester a bringa pa mi derecho
ku ta inherente na mi profeshon
Un muhé a demostrá su poder di konvikshon.

Na Boneiru tur hende mester a sak kabes
i rekonosé mi kapasidat
ora mi a resultá un bon wachtcommandant
Tur loke na Kòrsou tabata prohibí,
aki sí mi a konkistá
Na Kinder en Zeden Politie
mi a sirbi den un funshon partikular
Hiba un lucha ku moral
hasi hustisia tantu na víktima komo na akusado.

E imigrashon kaminda mi a traha,
ya mas mi no por a rekonos'é
Hoofdagent a subi trapi bai Parket
bira man drechi di Fiskal
deskubrí i koregí tur fout
ku koleganan ta traha den nan ferbal
Un muhé di poder so por okupá multiple funshon.

Awor ku mi karera a terminá,
mi sintimentu ta mengua
No ta tur deseo a mira lus di dia
Un kos mi sa, mi a hasi tur esfuerso
pa e muhé su rekonosementu
"Mua" pa e muhé uniformá
mi a bringa pa bo karga arma.

Lo mi sigui lucha pa bo bienestar
abo sigui studia literatura
Dokumentá kada stap di bo viktoria
sigui sali na bo vanguardia.

Mi a terminá mi karera
mi lucha pa empoderá muhé sí ta kontinuá
"Mua" pa Dios Todopoderoso
i na tur ku a kontribuí
na forma e muhé di poder
ku awe ami, Casandra, ta !
Dediká na
Casandra Martha riba su di sesenta aniversario
©Myrurgia Mutueel - 21.01.2013