WILLEMSTAD.- Nunka ba yega di enamorá asina profundo òf eksperensia un pashon intenso ku bo no kier a laga e otro persona bai? Esei ta e emoshon ku Remses Rafaela mihó konosí komo e bailarin i rapper MuisjeMuis, ke komuniká ku ‘Allang Allang’. El a kolaborá ku e talentoso rapper kurasoleño Dando ku tambe ta hasi un tremendo trabou riba e kantika.
E kímika  musikal entre Dando i MuisjeMuis ta asina great ku nan a disidí di traha huntu i produsí un EP ku ta plania pa salí na mart 2020. Segun MuisjeMuis ya e ku Dando a kompletá e promé track riba e EP aki i lo sigui publiká mas komposishon hot.
Jearnell Luidens, konosí komo Dando, tin hopi aña biba na Ulanda i ta kreando su nòmber komo rapper den e esena urbano.
‘Allang Allang’
E di dos single di MuisjeMuis pa 2019 tambe ta den e ritmo Afro Beat, i a keda produsí pa e talentoso produktor Zurich Music. Aki atrobe a meskla músika Karibense, huntu ku e trap merikano ku tòg tin un toke latino.
Ku e kantika ‘Allang Allang’ ku Dando,  MuisjeMuis ta keda trese su estilo musikal úniko pa demostrá un bes mas kon versátil su e talento ta realmente.
MuisjeMuis ta primintí di keda trese mas músika nobo pa fin di aña, i pa 2020 e ke lansa mas produkshon propio.