WILLEMSTAD.-  Djadumingu, 2 di desèmber Teatro KadaKen ta presentá su obra MULA un biaha mas den La Tentashon.
Riba e dia akí ta presentá dos obra aktual, MULA i Greaseman, durante e evento Eksploshon Teatral. Un evento pa selebrá desaroyo di teater riba nos isla ku ta hasi posibel produkshon di teater spièrtu ku ta toka temanan tabú i ku na un manera humorístiko ta tribi di wak e realidat di Kòrsou di un otro banda. Obranan ku ta hasi un impreshon profundo riba públiko i duna kuminda pa sigui pensa i papia. Riba e dia akí nos por gosa tambe di músika i aktuashon estupendo di aktornan. Bin eksperensiá, gosa i selebrá huntu ku nos.
Mula ta un obra profundo tokante un di e dékadanan mas sukú den istoria resien di Kòrsou. Un époka den kua gulidó di bolita tabata pobla sala di salida na Hato i tabata riska nan bida pa skapa di pobresa, paga debe òf festehá. Hopi di nan no a sobrebibí. MULA ta konta e istoria di e víktimanan aki di e kudishi pa plaka.
E dékada di 1997 pa 2007 te dia djawe a laga su marka riba e situashon sosial i polítiko di Kòrsou. Ounke hopi hóben no a eksperensia e tempu ei konsientemente, nan a lanta den un pais suheto na dekadensia moral, den kua mayornan tabata usa bruki di nan beibi pa skonde kontrabanda i hende tabata mira nan kurpa komo kònteiner. Límitenan di trato sosial aseptabel, violensia i odio propio a keda desplasá i ta parse ku kada generashon nan ta bai pèrdè mas i mas.
Den MULA, ku un presentashon solo, Schoobaar ta hasi tur ku e tin pa demostrá su talentonan variá na públiko profundamente. Ku su aktuashon habrí i direkto, Schoobaar ta toka un kuèrdè emoshonal delikado ku ta un ‘wake-up call’ pa e generashon aktual i esnan di futuro. Schoobaar mes a skibi e obra i e ta bou di direkshon eséniko di Milushka Birge i Schoobaar mes.
MULA ta e di sinku obra di Teatro KadaKen. Anteriormente e grupo aki eksitósamente a presentá Bos di Nos Pueblo (2015-2016), E Balada di Plùisje (2014-2015), Tisha (2012) i E Dekonstrukshon di Edsel K. (2009). Presentashon di Mula ta na Papiamentu ku tradukshon na Ingles
Un Eksploshon Teatral – djadumingu 2 di desèmber Teatro KadaKen te presentá MULA
ku Albert Schoobaar 2’or den La Tentashon

GREASEMAN
Het Volksoperahuis ta presentá Greaseman, un obra di teatro musikal ku entre otro Konkie Halmeyer riba su steelpan 5’or di atardi den Teatro Norman de Palm. Karchi optenibel na Mensing’s Caminada i Van den Tweel. E kos akí ta Real, no ta soña, bo a soña
E evento Eksploshon Teatral ta adekuá pa hóben i adulto. Pa mas informashon, bishitá teatrokadaken.org i facebook/teatrokadaken.