WILLEMSTAD.- Riba 26 di novèmber 2017, Teatro KadaKen ta duna su delaster presentashon di e obra MULA pa públiko general na La Tentashon. Despues di a presentá MULA mas ku 60 biaha pa mas ku 6000 hóben i adulto Mula ta yama ayó.
Karchi optenibel solamente na Mensing's Caminada, na balor di ANG. 27,50 i si sobra na porta!
MULA, skibí i aktuá pa Albert Schoobaar, ta un obra profundo tokante un di e dékadanan mas sukú den historia resien di Kòrsou, den kua gulidó di bolita tabata yena sala di salida na Hato i tabata riska nan bida pa skapa di pobresa, paga debe òf festehá. Ku su promé obra solo, Schoobaar ta duna tur ku e tin pa demostrá su talentonan variá na públiko. Su aktuashon habrí i direkto ta toka kuèrdè emoshonal i delikado; un ‘wake-up call’ pa e generashon aktual i esnan di futuro.

‘Mike ta kla. E ta wardando. Awe e ta desvelá e monumento MULA: prohibí pa lubidá. Su lema ta: “Si nos lubidá pasado, nos a kue awa!” Mike ta konta di e tempu ku e tabata mira krueldat den wowo di hende. E tempu ku e orkan di droga, atrako i likidashon tabata ras riba Kòrsou i laga atras un laster di destrukshon. E ta konta di e siguiente orkan, e tormenta ku ya yegando i ku nos no ta kla p’e. E úniko kos ku por salba nos ta nos memoria.’

MULA ta e di sinku obra di Teatro KadaKen. E obra ta bou di direkshon di Milushka Birge i Schoobaar mes. Anteriormente KadaKen a presentá Bos di Nos Pueblo (2015-2016), E Balada di Plùisje (2014-2015), Tisha (2012) i E Dekonstrukshon di Edsel K. (2009). Teatro Kadaken ta konosí pa su obranan spièrtu ku ta toka temanan tabú i aktual. Na un manera humorístiko ta tribi di wak nos realidat di un otro banda. E obranan ta hasi un impreshon profundo riba públiko i hende ta keda kòrda nan pa hopi tempu.
Banda di e funshonnan habrí, a presentá MULA pa skolnan sekundario, kompañá pa un programa edukativo. MULA ta posibel danki na sosten finansiero di Het Fonds Podiumkunsten, BankGiroLoterij Fonds i Prins Bernhard Cultuurfonds Caribisch Gebied.
MULA ta adekuá pa adulto i hóben for di 12 aña di edat. E último presentashon ta tuma lugá riba 26 di novèmber na La Tentashon i ta ser presentá di 6 or di atardi pa 7.30 or di anochi.
Pa mas informashon, bishitá teatrokadaken.org i facebook/teatrokadaken i Mula@theplay
òf yama 569-8417 òf meil na teatrokadaken@gmail.com