WASHINGTON, MERKA, AFP.- E laboratorionan Pfizer i BioNTech a anunsiá djaluna ku e vakuna desaroyá ta “90% efektivo” kontra Corona vírus, generando optimismo tokante posibilidat pa para e pandemia ku a laga mas di 50 mion persona infektá i 1,25 mion morto rònt mundu.
E anunsio tabatin un impakto positivo riba merkadonan i a duna speransa na e komunidat kontra lockdown, restrikshonnan i toke de keda ku a hinka mundu den un krísis ekonómiko i sosial profundo.
“Nos a dal un stap signifikativo pa duna mundu e avanse nesesario aki pa yuda kaba ku e krísis di salú mundial”, segun indikashon di e presidente di Pfizer, Albert Bourla.
Basá riba proyekshonnan, Pfizer i BioNTech a bisa ku lo suministrá un total di 30 mion dósis den 2020 i 1.300 den 2021.
E vakuna ta un di e mas di 40 kandidatonan desaroyá aktualmente, pero ningun otro laboratorio a proveé resultadonan avansá manera esaki.
Vários eksperto manera Anthony Fauci i e direktor di OMS Tedros Adhanom Ghebreyesus a selebrá e notisia aki. Sinembargo, otronan a señalá ku Pfizer i BioNTech no a publiká edat eksakto di e partisipantenan di e ensayonan. “Si e vakuna ta redusí enfermedatnan grave i morto i permití pa e pueblo en general bai bèk na e bida normal, esaki mester ta efikas pa esnan di edat avansá tambe den nos sosiedat”.
