WILLEMSTAD.- Direktiva di AMAK durante un reunion èkstra ordinario ku su miembronan, a diskutí riba e problema ku lei di molèster di zonido por produsí pa sera establesimentunan di horeca.
Ta fresku den nos memoria kuantu di e sitionan aki ya a keda afektá . Nos ta referí aki na e.o. Klup Deportivo Santa Rosa, Hòfi Fidel, Hòfi Bisheuvel,  Brakkeput Mei Mei, de Heeren, de Tropen, den e dianan ku a pasa menasa kontra di e diferente cafenan den Nieuwestraat.
Na final di e reunion general, èkstra ordinario, miembronan a pidi direktiva di AMAK pa organisá un manifestashon di protesta na Parke Wilhelmina, djárason dia 18 di yüli 2018.
Direktiva di AMAK ta hasi un apelashon riba tur miembro, doñonan di klup i cafe i tur demas lugánan di Horeca  i pueblo di Kòrsou en general, pa asistí na e manifestashon aki durante kua vários orador lo hiba palabra. E aktividat ta kuminsá pa 6’or di atardi.