WILLEMSTAD.- Djadumingu awor lo tuma lugá e di 41 edishon di My Guardian Group Walk & Run. Bou di e tema “My Health, My Wealth / Mi salú, Mi rikesa”, nos komo Guardian Group Fatum ta invitá e komunidat pa move huntu i dediká tempu na nan propio salú. Banda di e 10K Walk & Run i e Glory Runners Kids Run konosí, e aña aki nos ta introdusí e  5K Competitive Run, powered by Forward Running Club.

Ku e evento aki nos ta duna kontenido na nos kompromiso sosial. Kada aña di nobo nos ke brinda nos komunidat e oportunidat pa move huntu i traha na un estilo di bida mas aktivo i salú. Manera ta kustumber, nos ta doná un parti di e entrada di benta di T-shirt na organisashonnan ku, kada un na nan propio manera, ta dediká nan mes na bienestar di nos komunidat. Asina e impakto di e My Guardian Group Walk & Run ta bai mas leu ku e dia di e evento mes.

Sinku distansia ku un finish komun

E 10K ta start na nos ofisina na Cas Coraweg. E koredónan kompetitivo ta sali eksaktamente 6:30 di mainta, siguí pa e partisipantenan di e kaminata rekreativo. Nos ta orguyoso ku nos ta start na tempu i ta pidi tur hende pa ta presente ku sufisiente antisipashon. Nos ta pidi esnan ku ta kana tambe pa duna e koredónan sufisiente espasio na momentu di salida.

Nobo e aña aki ta e 5K Competitive Run pa partisipantenan di 18 aña i mas, powered by Forward Running Club. E distansia aki ta start 6:45 di mainta na TeleCuraçao i ta eksklusivamente pa koredó. Check-in ta di 5:45 te 6:15 di mainta. Esnan ku ke kana por partisipá na e 10K Walk & Run. Tur dos distansia ta pasa riba e Brùg Juliana i ta finalisá na Parasasa Beach.

E Kids Run, powered by The Glory Runners, tambe ta bèk pa e di tres aña. Muchanan den tim di atletismo ta kore 600, 1.000 òf 1.600 meter, depende nan edat. Ku e distansianan aki nos ta stimulá e partisipantenan mas yòn tambe pa disfrutá di deporte i moveshon. Check-in ta di 5:45 te 6:10 di mainta. Tur distansia ta finalisá na Parasasa Beach.

Paga i tuma bo T shirt di 21 te ku 23 di òktober

Djárason 21, djaweps 22 i djabièrnè 23 di òktober, partisipantenan por pasa na nos ofisina entre 5:00 i 8:00 di anochi pa paga i tuma nan T-shirt. Partisipashon na e 10K òf 5K ta XCG 15 pa persona. Pa muchanan den tim di atletismo e preis ta XCG 5. Pago ta posibel solamente ku tarheta di banko; e evento ta kompletamente cashless.

Registrá online so no ta garantisá partisipashon. P’esei nos ta konsehá partisipantenan ku no a paga ainda pa pasa mas pronto ku ta posibel: op = op. Partisipantenan ku a paga kaba via Sentoo por tuma nan T-shirt na e Sentoo Fast Lane spesial pafo i no mester drenta paden. Trese un dokumento di identidat bálido, e number di konfirmashon di registrashon i e konfirmashon di pago di Sentoo. Nos no ta reservá tamaño di T-shirt, tampoko pa esnan ku a paga via Sentoo.

Lab de Med lo ta presente durante tur tres anochi pa brinda e oportunidat di hasi un chèk di salú promé ku e My Guardian Group Walk & Run. Ademas, partisipantenan ta risibí un armbant motivashonal grátis ku e tema “My Health, My Wealth”.