30 ora nònstòp

WILLEMSTAD.- Radio Hoyer e Solo di Pueblo dia 9 di òktober próksimo tei toka 30 ora nònstòp piesanan lokal so. Esaki den kuadro di preparashon pa su di 65 aña di eksistensia otro aña dia 10 di mart.

E tim di dj i lokutornan di e radio emisora a uni pa duna Kòrsou i Mundu un espektákulo total di piesanan lokal for di 19 ayera pa 20 awe. E baul ta habri den e diskoteka kaminda piesanan ta bai zona anto sin ripitishon. Esaki demostrando kuantu komposishon i piesanan nos artistanan lokal a graba.

E ambiente di 30 ora nònstòp tokando ta start dia 9 di òktober pa 4 or di atardi ku dj. Danger i lo finalisá dia 10 di òktober ku dj. Anthony Maduro. E 30 oranan aki bo ta bai haña piesanan ku nos ta sigur ku bo tin hopi aña sin skucha i te ku esnan ku bo ta skucha tur dia. Anto kada un ta un sin mester ripití pa mustra bo kon grandi e diskoteka di Radio Hoyer ta.

Lo tei tambe dj. Nanie, Angelo Virginie, John Anthony i tambe Wendell Martis ku huntu ku dj. Danger i Anthony Maduro lo totalisá e 30 oranan di piesanan lokal so.

Un elenko grandi ku no a spar energia pa duna abo oyente e ambiente ku ta di nos. No por keda sin menshoná Lady dj. Hariette Pikero ku ta instrumental tras di selekshon di e piesanan lokal ku lo bai keda toká durante 30 ora largu nònstòp.

Pues no lubidá ku bo tin un sita ku e Solo di Pueblo ku e ambiente di 19 ayera pa 20 awe dia 9 i 10 di òktober awor. Ta pa mundu nos ta trese esaki.