WILLEMSTAD.- Ayera djadumingu 31 di mart 2019, famianan i konosínan a tuma despedida di e gran baluarte farandulero, Don Felio Colinet. Felio  a bai laga nos, nèt na momento, ku tin preparashonnan intensivo pa selebrá e di 50 edishon  di karnaval i Festival di Tumba na Kòrsou.
Felio tabata un trahadó inkansabel  durante añanan 70, pa e diferente fundashonnan di karnaval i su aporte  na aktividatnan di karnaval tabata inmenso. Ku su forma trankil e tabata atendé ku situashonnan difísil ku sa presentá na diferente okashon.
Despues ku Felio a baha ku penshun, el a bai dediká su mes na dokumentashon di partinan importante di Karnaval i Festival di tumba. El a publiká tambe un buki ku nòmbernan di kaya.
Na  okashon di selebrashon di e di 45 edishon di Karnaval i Festival di Tumba, el a publiká bukinan ku hopi informashon balioso di e aktividatnan menshoná.
Lamentablemente Felio no por tei na momento di e selebrashonnan di otro aña, pero ta su obranan ku su dokumentashonnan, lo ta e guia pa prensa i pueblo.
Na momento ku nos a asistí e seremonia di despedida, nos a sinti falta di dirigentenan di karnaval di pasado i aktual, mandatarionan i otro gruponan di interes, ku a traha hopi di aserka ku Felio pa duna rèspèt pa e gran siudadano aki. Awe lo krema e restunan di e gran ilustre kurasoleño aki. Forsa na famianan i ku Felio sosegá na pas.