WILLEMSTAD.- Djaweps siman pasá Mundu Farandulero,e spesialmente esnan di mas edat a keda sorprendí ku fayesimentu di Hamilton Subaran.
Hamilton tabata, tata di e konosido Junny Subaran ku tambe tabata toka drùm, a militá den diferente agrupashon musikal i tabata konosí komo un tremendo drùmer.
Nos ta referí aki na entre otro Moron Combo ( Norman Moron), Niño Samson i su Combo, Estrellas del Caribe i Aristo Combo ta algun dje agrupashonnan musikal ku nos  ta kòrda ku Hamilton a militá aden.
Ku Norman Moron el a toka durante vários aña den hotèlnan lokal i den añanan 90, Hamilton tabata un dje miembronan di Hurado pa Festival di Tumba.
E tabata koperá tambe komo miembro di hurado den kantidat grandi di Festivalnan di Bario ku tabata tuma lugá, espesialmente den añanan 90.
Riba tereno deportivo tambe Hamilton tabata árbitro pa e deporte di futbòl i bòkseo,
Su amigunan sigur ta bai sinti su falta di un gran personahe i nos ta sigur ku e tambe lo bai forma parti di e orkesta selestial.
Djaweps próksimo lo tin despedida di Hamilton na El Tributo di 1’or pa 3’or, siguí pa un rèspòns i despues lo hiba Hamilton na su último lugá di sosiegu na Santana na Berg Altena.
Direktiva di AMAK ta pidi tur esnan ku por pa hasi akto di presensia na e seremonianan di despedida. Ku bon Dios tuma Hamilton den su Reino