WILLEMSTAD.- Mundu farandulero den oranan tempran di awe mainta a keda di shòk ku e notisia ku Uti ya no ta mei mei di nos mas.
Manera ta konosí, algun aña pasá, Uti a konfrontá problemanan serio ku salú i na e okashon ei, mester a bai risibí tratamentunan den eksterior.
Despues ku Uti a regresá Kòrsou, gradualmente, Uti a rekobrá su salu satisfaktoriamente i a kuminsá move i a presensia vários aktividat.
Na 2016 miembronan a proponé durante di un reunion general unánimemente pa dediká Festival di Tumba na Uti Gregorio.  E eskoho aki tabata pa e trabounan meritorio ku Uti a realisá komo areglista di vários areglo eksitoso ku a keda premia.
Despues ku Uti a terminá skol na Kòrsou, el a bai Ulanda pa bai studia músika na konservatorio. Aki el a  militá den vários agrupashon musikal ku tabata toka diferente género di músika.
Uti tabata un ferviente amante di músika di Jazz i komo tal tambe el a aktua den diferente konstelashon ku ta toka e músika di género di Jazz.
Na Ulanda Uti a sera konosí ku  Richinel Keridongo alias Babalu i na momentu ku nan a regresá Kòrsou, Uti tabata un dje piesanan prinsipal di BESS.
BESS tabata un agrupashon musikal hopi popular ku tabata toka na un nivel musikal hopi haltu. E agrupashon musikal aki a  presentá tambe na Ulanda i despues di BESS Uti a forma parti tambe di Unisono.
Uti tabata un di e fundadónan prinsipal tambe di Gio Fuertisimo ku atraves di añanan a bira hopi popular den nos farándula i durante di diferente Festivalnan di Tumba. Uti tabata konosí komo un músiko krítiko serio, pero semper dispuesto na yuda otro hóbennan ku ta inisiá den e ramo di músika.Kòrsou i mundu farandulero en espesial lo bai sinti hopi falta di un gran baluarte musikal manera Uti Gregorio, pero su areglonan i su músika lo keda resoná na radio emisoranan lokal, pa di e forma ei nos keda rekord’é. Uti sosegá na pas.

Direktiva di AMAK