WILLEMSTAD.- Mundu farandulero a keda di shòk, pa e notisia ku Luti Samson a bai laga nos, komo ku Luti tabata aktivo den diferente aktividat i ketu bai por a kanta i pone su bos resoná.
Luti tabata un bon kantante , un bon kompositor i un bon hende i semper bai amabel.
Luti ta nos eks Rei di Tumba, ku na 1982 a tembla stadion di SUBT interpretando e komposishon di Rene Samson, su ruman, den un forma sublime.
Luti a pega vários hit, ku te ku dia djawe ta resoná lokal i internashonalmente. Nos ta referí aki na e numero, ‘Mi so den Boso’. Athunto un reprodukshon di su bida artístiko, manera a keda publiká den e buki di prensa di Festival di Tumba 2014 di AMAK.
AMAK ta deseá famianan di Luti forsa na e momentonan difísil aki. Luti sosegá na pas.

Luti Samson:

“Un kurpa salú ta e reseta di un bon músiko”

Nòmber: Ludwig R. “Luti” Samson. Luti ta di bario di Buena Vista.
Ela nase: 8 Mart 1933 i ta oriundo di e bario Buena Vista.

Luti su Infansia i hubentut :

Despues ku Luti a hasi 4 aña e la bai biba serka su wela kaminda e la keda biba te ku algun luna promé ku e la regresá seka su mama pa e por a kasa ku su esposa (QEPD). Bibando serka su wela el a kuminsá yud’é den un tienda ku e wela ta tin. Fo’i su edat di 14/15 aña, Luti a kuminsá toka ku su amigunan den bario i nan tabata traha diferente instrumento di bleki.

Luti a kuminsá su enseñansa na St. Thomas i despues el a bishitá Skol di Fishi di Shell. Einan el a studia 3 aña den e departamento “Werkplaats”  i despues a bai traha 10 aña na Shell. Despues el a traha 18 aña na Piskalat i tambe 8 aña na GOG komo “Kinderberschermer”. Por último Luti a traha na Kranshi 5 aña den departamento di Sédula. Aparte di eseinan tambe Luti a sigui kursonan di “ Public Speaking” i tambe Franses den su tempu liber.

Na edat mas grandi Luti su primu a bisé ku “ Estrellas del Caribe” ta buskando un kantante di “Guaracha”.

1940          Luti a sigui un estudio di kanto hopi konosí via di Mexico kaminda e tabata graba komposishonnan i manda nan Mexico pa su dosentenan por a kontrolá esaki.

1951                Na aña 1951 Luti a drenta Estrellas del Caribe ofisialmente , den kua e la kanta mas o ménos 8 aña. Ku e banda ei Luti bai kanta na vários pais. E.o. Aruba, Venezuela i Boneiru. Despues, pa motibu ku el a bira malu, Luti a wanta 6 aña ku kantamentu.

1965                Na aña 1965 Luti a kuminsá kanta atrobe  i a komponé i graba bários kantika ku diferente banda i artista, i tambe a traha ku hopi músiko konosí den bandanan manera San José, Estrellas del Caribe, Sonora Antiana i tambe Hóben den Caribe, Super Dynamic i Ronchi Matthew, Toro Colina, Arnell Salsbach, Minguelito Cuni, Grass Man, Doble R i e banda di Macay. Durante Luti su trayektorio komo solista el a haña petishon pa bai kanta na Aruba pa 1 siman. Debí na e demanda asina grandi Luti a keda Aruba mas ku dos siman pa kanta den e temporada di Karnaval.  Vários biaha Luti a risibí plaka di rekonosementu pa trabounan ku el a hasi.

Luti komo tumbero

1972                Na aña 1972 Luti a debutá den Festival di Tumba ku e komposishon “Hisa Benta”.  Luti a partisipá 30 aña den Festival di Tumba kaminda e la finalisá na diferente lugá. Na aña 1982 El a konkistá e premio máksimo, Rei di Tumba 1982, ku e komposishon “Kologá” kompaña pa Doble R. Den Luti su trayektorio musikal e la komponé mas o ménos 50 kansion i a komponé tambe i graba 2 kansion Gospel.

Luti su bida  te na e momento di despedida

Luti tabata  disfrutando di un penshon meresí. Pero esei no ke men ku e la stòp di kanta.  Luti a sigui kanta pa kuida e bos. Tambe Luti tabata yuda diferente mucha i hóben ku kanto. E sa bai kanta tambe ku su ruman, ademas di sa pasa su tempu tokando Kitara.

Un di su ‘jingle’ nan hopi popular ta esun di ‘Bon Bini Supermarket’.

Luti a sigui komponé i graba pa diferente artista te ku resien.