WILLEMSTAD.- Direktiva di AMAK a tuma nota di fayesimentu di e gran baluarte, intérprete i kompositor Nildo Martis.
For di prinsipio di Festival di Tumba den añanan 70, Nildo Martis tabata aktivo den Farándula i un di su promé tumbanan ku a kousa hopi furor tabata e tumba: Un Tabla lo bula. Ta trata aki di un tumba di durashon largu i ku a keda toká durante hopi tempu. Pa motibu di su kontenido i pa motibu ku Nildo a deklará ku el a hasi e tumba largu pasó e pueblo ta gosa, esaki a pone ku e tumba aki a keda zona te ku e dia di awe.
Aparte di Festival di Tumba, Nildo Martis a forma parti di diferente agrupashon musikal manera Grupo Tres, La Perfecta, Enica i vários otro agrupashon musikal. Despues di tempu Nildo Martis a tuma e desishon pa bai Ulanda, kaminda aya tambe el a keda aktivo i na hopi okashon e tabata bin Kòrsou bèk pa partisipá den Festival di Tumba.
Durante último añanan, Nildo Martis a konfrontá problema ku salú, pero semper bai a keda e mesun persona alegre ku e tabata.
Lamentablemente e lo no tei pa selebrá e di 50 edishon di Festival di Tumba, pero meskos ku esnan ku ya a bai laga nos, AMAK lo buska un fórmula pa rekordá nan tur durante di  e 50 edishon di Festival di Tumba.
Nos ta deseá forsa na famianan di Nildo Martis i nos ta sigur ku Todo Poderoso lo dun’é un bon lugá den su reino. Ku Nildo Martis sosegá na pas.