WILLEMSTAD.- Amantenan di Najib Amhali for di awor por nota djadumingu 22 i djaluna 23 di desèmber den nan agènda. Despues di 5 aña e komediante ta bèk na Kòrsou, ku su show teatral mas resien i eksitoso ‘Waar Was Ik?’(Unda Mi Tabata?)
E show di Najib Amhali “Waar Was Ik?, ta duna kontesta riba e pregunta, dikon aña pasa e tabata obligá di kanselá su shownan. Un show ku hopi historia personal, ku hopi harimentu, kaminda ku amigunan bieu ta pasa un ratu i ku na final di e show bo ta puntra bo mes: “Unda Mi Tabata?’.
Najib a sinti falta di Kòrsou i no por warda pa regresá bèk na su isla preferí.
“Amhali no ta spar su mes, e ta sinti ku e tin ku duna su fanátikonan un splikashon, dikon aña pasa e la kanselá 120 presentashon i mas ku esei e ke toka su bishitantenan ku historianan ku nan ta rekonosé. Tin momentunan den e show ku e ta tin e kurashi pa bini ku kosnan gròf dilanti, pero ku dor di e historia ta toka bo kurason. Pa motibu di e gran intensidat chistoso, nunka e show por a degenerá den un seshon di terapia. Wak rondó di bo i ripara ku bishitantenan ta kue man di nan partner tene duru i bo sa ku: e ta komprendibel”, parti di un resensia di Algemeen Dagblad di Ulanda.
Karchi optenibel na: Avila Beach Hotel, Supermarket van den Tweel, Mensing’s Caminada, 24 uur uit de muur i Bruna. Benta di karchi ta kuminsá djaweps 14 di novèmber.