WILLEMSTAD.- Djasabra último tur e integrantenan ku a toka den agrupashon musikal ‘NAME’ a bin huntu pa rekordá e dushi tempu di e banda.
E muchanan di Dr. Roy ‘Kalumbambe’ Heereveen tabatin un atardi ku hopi alegria, harimentu i tambe momentunan emoshonal.
Músikonan manera Niel Felida, Bachi Bachi, Gibi Doran, Cuco Cruz, Henry Emerenciana, Naty Elisabeth, Orlando Jansen, Aitel Pieters, Finchi Statia, Kensly Bart, Roy Brion, Elvis Petronia, Juni Bernadina, Apio Andrea, Ramses Seinpaal i Winchi Andrea a forma parti di NAME.
Riba e atardi di re enkuentro e desishon a kai pa fin di aña i komienso di otro aña ‘NAME original’ tei zona na Kòrsou i ku hopi sorpresa.
E grupo a skohe pa Finchi Statia komo nan relashonista públiko.
NAME den su tempu a toka masha hopi na Kòrsou, Aruba, Boneiru, Colombia, República Dominicana i Venezuela kaminda NAME a dal masha duru mes ku e salsa ‘Te he Perdido’.
Notabel ta ku e grupo nunka a toka na Ulanda, apesar di tur e petishonnan. Ban mira ku awor si e muchanan di Dr. Roy Heereveen lo bai zona nan hitnan na Ulanda tambe.