MERKA.- Un petishon nobo pa laga R. Kelly den libertat a keda rechasá ayera durante di un kaso den korte na New York. Kelly aktualmente ta keda akusá di tráfiko seksual, abuso seksual i publikashon di pornografia infantil.
E petishon pa Kelly keda poné den libertat, pendiente tratamentu di e kaso a keda hasí pa su abogadonan debí ku segun nan, Kelly ta sufri di problemanan médiko den prisòn.
E hues Steven Tiscione a rechasá e petishon i a bisa ku Kelly tin chèns di hui i ta un peliger pa seguridat públiko.
Kelly a keda arestá den luna di yüli 2019 debí na diferente akusashon seksual, inkluyendo sèks forsá, maltrato i sèks ku menor di edat. E huisio kontra di Kelly na Chicago lo kuminsá den luna di aprel 2020 i lo tuma mas o ménos tres siman pa e tratamentu di kaso ta kompletá.