MERKA.- E clan di Kardashian/ Jenner definitivamente gusta basketbòl. Awor ta resultá ku Kendall Jenner lo mester ta den un relashon ku Ben Simmons, hungadó di basketbòl profeshonal ku e tim di ‘Philadelphia 76ers’. E strea di televishon real, segun e portal ‘Page Six’ pa algun siman kaba ta den un relashon i resientemente a keda mira na un hotèl na Los Angeles i tambe na un restorant na New York. ‘Seguridat a tuma medida pa dje forma ei garantisá ku Kendall i Ben por a disfrutá di nan anochi sin niun interupshon’, asina un testigu a informá. Simmons resientemente tabatin un relashon ku e kantante ‘Tinashe’, miéntras ku Jenner tabatin un relashon ku e hungadó di basketbòl, Blake Griffin di Detroit Pistons. Bo por yega na e konklushon ku e famia gusta basketbòl, pasó praktikamente tur e amantenan, for di Lamar Odom, Rick Fox, Kris Humphries, Tristan Thompson, Jordan Clarkson, Blake Griffin, James Harden, Rashad Mc Cants i Chandler Parsons ta òf tabata hungadó di NBA .