WILLEMSTAD.- Pa e edishon spesial di EXTRA, ‘DEN E BEMBE’ a sostené un entrevista ku Glenssyl ‘Chucho’ Albertina, CEO i Creative Director di GA Bookings & Event. E tema ku nos a toka ta esun di e género urbano na Kòrsou i den Reino.
Pa loke ta trata nos artistanan lokal residensiá tantu na Kòrsou komo na Ulanda ‘Chucho’ ta di opinion ku nan mester sali for di nan ‘comfort zone’ si nan ke logra mas ku nan karera artístiko.
‘Nan mester bai ku e trein’, asina Chucho a kuminsá splika. E esenario aktual ta un temporal kaminda e no ta kere ku pa aki 10 pa 20 aña ainda e pueblo lo ta skuchando e músika ku ta keda produsí aktualmente.
‘Awor te ora ku nan tin ku dal e siguiente stap. Nan mester meskla nan mes ku artistanan internashonal. E papiamentu ta zonando, e ta zonando hopi. Meskos ku Jeon a skohe e área Latino, ku tambe ta hopi amplio, bo tin tambe e ulandes ku tambe ta bezig ta kue tur e vibrashon dje islanan. Einan nan mester bai focus riba dje.

Biba dje músika
Pa loke ta e artistanan ku ta bibando dje músika ku nan ta produsí, Chucho a indiká ku ‘E gainan ku ta na Ulanda ta bibando hopi bon di muzik. Nan a hasi nan hùiswèrk pa nan por biba bon. Mi ta kere ku e gainan di Kòrsou lo tin hopi chèns, sigur esnan ku tin talento.
Ta un plataforma e ta, meskos ku nos tin nos koleganan yu di Kòrsou bibá na Ulanda ku ta ekspandé. Meskos ku bo tin Jandino ku ta papia papiamentu masha bon, pero el a mira ku e tin ku adaptá su mes pa e ta mas komersial, esei e gainan tin ku hasi. Nan tin ku sali for di nan ‘comfort zone’ anto no kai den e hype.
Un ehèmpel ku ‘Chucho’ a duna ta esun di aworakí bo ta pega un kantika aki bou, bo ta toka na tur fiesta di kas, fiesta di banko i tur fiesta komersial ku tin i ku pa abo ta oké, segun bo, pero e ta temporal, e hype ta kaba lihé. Ora e hype pasa, bo ta afó!.
Bo tin ku usa e plataforma pa bo ekspandé, traha ku mas gai, bai mas tantu afó i inbertí den bo mes, esaki ta e tep ku Chucho ke duna na nos artistanan lokal den e género urbano.
Si bo no a mira e entrevista di Glennsyl ‘Chucho’ Albertina ainda, subi e página di facebook di EXTRA ‘Extracuracao’ i lo bo por wak e entrevista ku ya tin mas ku 6900 views.