WILLEMSTAD.- Djadumingu awor Fundashon JAG ta organisá e inskripshon ofisial pa elekshon di embahadornan di Karnaval.
For di 3 or pa 6 or atardi e partisipantenan na e elekshonnan pa skohe e embahadornan di karnaval 2020, e di 50 edishon lo tin e chèns pa inskribí nan mes.
Durante dje evento lo sera konosí tambe ku e tumberonan ku ta bai partisipá na e di 40 edishon di Festival di Tumba Hubenil.
Tur hóben (kompañá pa un representante) i adultonan ku a registrá kaba ta bon biní pa inskribí nan mes ofisialmente. Si tin persona ku ainda kier inskribí, nan por hasi esaki riba e fecha ariba menshoná. Tur partisipante ta keda invitá pa bin inskribí nan mes na un manera “Kreativo Karnavalesko” pa asina duna realse na e dia aki.
Pueblo di Kòrsou tambe ta keda invitá pa bin apoyá i sostené tur esnan ku a registrá nan mes pa engrandesé e elekshonnan i karnaval di Kòrsou.
Fundashon JAG ta spera boso na Curaçao Festival Center, djadumingu 24 novèmber 2019, for di 3 or te ku 6 or.