WILLEMSTAD.- Nando Chirino, e kantante kurasoleño bibá na Ulanda, ta lansa un piesa nobo huntu ku e banda La Fiesta. Ta trata akí di un Bob Marley Medley estilo Kizomba.

Nando, mihó konosí komo ‘Juice’, no ta deskonosí den mundu di farándula lokal i ulandes i tin un karera musikal di mas ku 30 aña den entretenimiento. Nando a militá pa hopi aña den bandanan renombrá na Aruba manera Oreo, Quasi i Ricochet.

Den pasado e tabata tambe vokalista prinsipal di Re-wind i Orquesta Vibes na Ulanda. Huntu ku e agrupashonnan musikal akí el a lansa diferente disko kompakto i tambe skor diferente hit na vários emisora lokal.

For di aña 2006 te ku awó, Nando ta forma partí di e show band La Fiesta, un banda dinámiko ku tin mas ku 20 aña di eksistensia. E agrupashon ta move regularmente den sírkulonan privá, eventonan di kompania i diferente festival popular.

E banda ta distinguí su mes for di otro bandanan 'all-around' pa medio di un repertorio úniko i meks amplio, unda ta varia entre kansionnan latino, kurasoleño, surinameño (kaseko) i tambe pop.

E piesa nobo ku a wòrdu lansá ta un ‘medley’ di diferente kansionnan popular di e legendario Bob Marley, manera ‘Jamming’, ‘I shot the sheriff’, ‘One Love’ i ‘No woman, No cry’.

E ‘medley’ ta di e popularísimo ritmo Kizomba, kual a keda hinká den un bachi totalmente nobo, areglá pa e talentoso Carlos Matos. E ‘medley’ ta keda kompañá pa un videoclip, ku por keda mira riba e página di YouTube di La Fiesta AllRoundBand.

E Bob Medley Kizomba Style di Nando Chirino huntu ku La Fiesta lo por keda skuchá entrante awe na tur radio emisora lokal, pues yama i pidi p’e.

Bishitá www.lafiesta.nl pa mas informashon òf chèk e Facebook página/lafiesta.allroundband òf tumá kontakto via info@lafiesta.nl