WILLEMSTAD. – Despues ku algun siman atras e talentoso kantante lokal Naomi Silvanie a lansa e kansion ‘Joy # Dushi Feeling’, awe nochi lo e tin su ‘release party’ na Papagayo Beach Club. ‘Joy’ a keda produsí pa Url Isenia i ta relatá tur e ‘Joy’, legria ku bo ta sinti na momentu ku bo konta bo bendishonnan i ta gradesido pa kada kos chikí. Gratitut ta atraé milager, pues stòp di keha i mira e parti briante di bida. Segun Naomi Silvanie, esaki ta algu ku tur hende por mira bek den nan bida. Bida ta manera laman, bo por keda impreshoná pa e ola di laman i e grandesa dje oséano òf bo por skohe pa drif riba bo lomba i bira un ku e olanan di laman. No laga niun hende kita bo legria, mantené bo bunitesa interno. Pa e ‘release party’ di awe nochi mester registrá riba e website: www.naomisilvanie.com Papagayo Beach Resort lo tin un ‘happy hour’ for di 5’or pa 7’or i pa 8’or di anochi e evento lo kuminsá pa terminá 11’or. Bin disfrutá di un anochi úniko animá pa Naomi Silvanie i dj Krokkz. E evento ta un pa públiko 16 plùs. Trahe pa e anochi ta ‘Casual Chic’.