WILLEMSTAD.- Despues ku nos Miss Kòrsou 2016 Chanelle de Lau a hasi un tremendo i magnífiko trabou i laga mundu sa di Kòrsou, Coridja Stars Productions ke anunsiá ku Srta Nashaira Balentien lo ta Kòrsou su próksimo representante na e prestigioso sertámen di Miss Universo 2017 i Liane Bonifacia lo representá Kòrsou na Miss United Continents 2017.

Despues ku aña pasá Nashaira a keda eligí komo Miss World Curaçao i pa motibunan ya konosí, no a partisipá mas den e sertámen aki, nos di Coridja Stars Productions mirando tur e preparashonnan ku a wòrdu hasí i e kualidatnan ku Nashaira ta poseé, a disidí ku lo delegá e beyesa aki komo Kòrsou su representante na Miss Universo 2017.

Djaluna awó, 12 di yüni den un aktividat ameno i den presensia di algun invitado i prensa, koronashon di Nashaira lo tuma lugá ofisialmente.

Nos ta sigur ku Nashaira tambe lo ta otro digno embahadora di nos pais na Miss Universo 2017 ku lo tuma lugá dia 26 di novèmber 2017, esei ta nifiká ku mesora preparashonnan lo kuminsá pa nos representashon ta total.

Liane Bonifacia, ku ta nos Promé Finalista Miss Kòrsou 2016, tabata otro tremendo kandidata ku a demostrá un nivel haltu di inteligensia i beyesa.

Durante e aña ku a transkurí, Liane a tuma su responsabilidat hopi na serio, Coridja Stars Productions a risibí hopi bon reakshon i petishon pa Liane partisipá na un sertámen Internashonal i di nivel.

Evaluando tur e aspektonan aki, C.S.P. lo delegá Liane Bonifacio pa Miss United Continents na Ecuador ku lo tuma lugá 23 di Sèptèmber 2017. Naturalmente nos ta konta ku sosten di pueblo di Kòrsou kompleto su apoyo pa nos digno representantenan.