NASHONNAN UNI, USA (AFP).- Konseho di Seguridat di Nashonnan Uní a aprobá un resolushon ku ta apoyá un proposishon pa “wanta ku e guera” den Gaza, meimei di un kampaña diplomátiko intenso liderá pa Merka pa preshoná Hamás pa aseptá e akuerdo.
E teksto, redaktá pa Merka, ku a konta ku 14 voto na fabor i e apstenshon di Rusia, “ta saludá” un proposishon pa dianan sin guera miéntras ku ta liberá e rehennan ku ainda ta den poder di Hamas.
E resolushon tambe ta sigurá ku Israel ya a “aseptá”un proposishon pa “tregua” i ta hasi un apelashon riba e movementu islamita palestino Hamas pa “nan tambe aseptá i ku e dos partidonan ta apliká términonan, sin tardansa i sin kondishon”.
Hamas “ta saludá e resolushon di Konseho di Seguridat i ta deseá na reafirmá su disposishon pa koperá ku e rumannan mediadó pa entablá negosiashonnan indirekto riba e aplikashon dje prinsipionan aki”, segun a indiká den un komunikado.
Despues di ocho luna di konflikto, e plan ta referí na un periodo di seis siman ku ta stòp ku e guera, kompañá pa e retirada di forsanan di Israel for di zonanan poblá di Gaza i e liberashon di rehennan di ámbos parti.
Merka den pasado a keda hopi kritiká pa a blòkia vários proyekto di resolushon ku tabata pidi pa stòp ku e guera den Gaza. Pero Biden luna pasá a lansa un plan nobo pa logra un akuerdo.
“Awe nos a vota pa pas”, segun e embahador norteamerikano na Nashonnan Uní, Linda Thomas-Greenfield.
