RUSIA.- E kantante merikano, Nicky Jam ku ta interpretá ‘Live it Up’, e himno di kopa Mundial a sigurá ku e lo representá e latinonan den e seremonia di klousura di e torneo.
‘Nan a bisa ku tur e ekiponan latino ta eliminá. E latinonan tei presente, nos no a bai niun kaminda’, asina Jam a bisa na spañó durante di e rueda di prensa den stadion Luzhniki kaminda e tabata kompaña pa Will Smith i Era Istrefi.
Jam, di tata portorikeño i mama dominikana, a atmití ku e ta hopi nèrvioso i ansioso pa e responsabilidat pa aktua dilanti mas ku mil miónes di hende.
‘E ta un dje aktuashonnan mas importante di mi bida. Will ta un ikono. Mi ke pa e públiko disfrutá i na final bisa ku Nicky a ofresé un bon espektákulo i ku el a representá e latinonan bon’, asina Jam a komentá.
Jam a pusta pa Fransia komo e ganadó di e final di mayan djadumingu kontra di e kroatanan i el a bisa ku su hungadó preferí ta e portugues, Cristiano Ronaldo.
E momentu mas impaktante pa Jam den e mundial ta e echo ku e fanátikonan di Hapon a limpia e parti dje tribuna kaminda nan a sinta, despues ku nan a pèrdè e wega kontra di Bèlgika.