WILLEMSTAD.- Djasabra anochi, 15 di desèmber ‘Vorst Frans’ di ‘Nieuwe Limburgse Kabrieten’ a presentá e tema i trahe pa Gran Marcha 2019.
Ku un asistensia grandi na Bedrock Cafe, ‘De Nieuwe Limburgse Kabrieten’ a skohe un tema ku ta data for di añanan 60 i kuminsamentu di dékada 70. Den e periodo ei den área di New York a kuminsá ku ‘Woodstock festival’ un festival konosí pa bandanan di Rock kaminda muzik di kitara tabatin un ròl importante i kaminda e hóbennan tabata disfrutá di dje.
Un kultura nobo a inisiá kaminda e meta prinsipal tabata: ‘Peace, Love & Music’.
Na mes momentu na San Francisco a kuminsá ku e kultura di ‘Flower Power’, un ambiente kasi igual na ‘Woodstock’.
Animashon musikal pa ‘De Nieuwe Limburgse Kabrieten’ lo ta na enkargo di Joris Reer di Radio Dolfijn FM, konosí komo ‘Wakkere Joris’. E lo pèrkurá pa e animashon riba e karosa tradishonal di ‘De Nieuwe Limburgse Kabrieten’.
Riba foto bo por apresiá e trahe kolorido ku ‘De Nieuwe Limburgse Kabrieten’ lo desfilá kuné den Gran Marcha 2019.