LOS ANGELES.-  Bronny James, yu hòmber mas grandi di e super estrea LeBron James, ta entre e sinku hungadónan di basketbòl amatùr, ku a firma dil di spònser ku Nike, asina e marka deportivo a anunsiá ayera. E hóben James, kende djaweps último a kumpli 18 aña, ta un guard na e skol sekundario Sierra Canyon High School banda di Los Angeles, miéntras su tata  ta e kuater biaha kampeon di NBA di 37 aña pa Los Angeles Lakers. Bronny ya a bira parti di merkadeo di Nike pa nan kèts mas nobo, Nike LeBron 20. Términonan finansiero di e dil no a keda revelá. Na 2015 LeBron a firma un akuerdo di bida largu ku Nike, despues di a traha ku e fabrikante di kèts  for di tempu ku e tabatin 18 aña komo un prospekto di skol sekundario. James a yega di bisa ku e ta spera di por hunga banda di su yu un dia den NBA. Bronny a firma un NIL dil, pa derechinan di nòmber, imágen i gustamentu, huntu ku kuater otro guard hóben di basketbòl. Tres di nan ta hende muhé: JuJu Watkins kende tambe ta studiante na Sierra Canyon, Caitlin Clark di universidat di Iowa i Haley Jones di e universidat di Stanford. E di sinku ta D.J. Wagner kende ta den skol sekundario  na New Jersey i kende ta spera di bira e promé hungadó di tres generashon den NBA. E ta nietu di Milt Wagner kende a gana un título di NBA ku Lakers na 1988 i ta yu di Dajuan Wagner ku tabata kompañero di ekipo di LeBron James den e estrea su promé dos temporadanan  di NBA ku Cleveland Cavaliers, promé ku problemanan ku salú a terminá su karera na 2006.