WILLEMSTAD.- Lisette Jansen, presidente di Fundashon Karnaval di Banda Bou a koroná Nissah Libiee ayera tardi komo Reina di Karnaval Banda bou 2020.
Manera ta konosí FKBB a informá ku pa Karnaval 2020 nan lo no a organisá Elekshon di Reina, Prens i Pancho Banda Bou.
E ta un produkto ku normalmente Gobièrnu no ta kumpra serka FKBB i pa mantené e gastunan abou i kaba di atendé sierto pagonan di 2019 a yega na un akuerdo ku Fundashon JAG ku ora di nan Elekshon Adulto, e Reina ku keda eligí komo e Promé Finalista lo representá e Karnaval di Banda Bou 2020.
Ayera e Promé Finalista, Nissah Libiee a keda koroná ofisialmente komo e embahador di Karnaval di Banda Bou 2020.
Presidente di FKBB, sra. Lisette Jansen a yama Nissah mas ku bon biní na Banda Bou, ku e pueblo di Banda Bou lo risibié ku brasanan habrí i ku lo no tin duda ku Nissah lo ta un tremendo embahador di Karnaval Banda Bou 2020.