KRALENDIJK – E banda
kriminal NLS (No Limit Soldiers)
ta aktivo na Boneiru
tambe? Esaki ta un pregunta
ku ta surgi mas i mas den komunidat,
mirando kon kriminalidat
ta birando mas grave i
duru riba e isla aki, kombiná
ku e echo ku riba murayanan
di e edifisio di LWV (Waterleiding)
a skirbi nòmber di e
banda kriminal aki. Ta algu ku
sigur mester haña e atenshon nesesario di outoridatnan.
Un suidadano prekupá a
papia tokante un situashon ku
por ta algu serio. Ta trata aki
di e grupo di kriminal ku tin
na Kòrsou, ku lasonan na Hulanda
i kisas na Boneiru tambe.
E suidadano atento aki a mira
e logo òf inisialnan di e grupo
esta ‘No Limit Soldiers’ (NLS)
riba muraya di e edifisio di
LWV na Ser'i Chawawa den e
bario Antriol. E grupo di
bandidu aki, establesé na
Kòrsou, ta un grupo hopi
peligroso.
Tantu riba e muraya di e
edifisio pegá ku e tanki riba
seru, komo tambe riba un
bòrchi di tráfiko, e inisialnan
di NLS ta bria. NLS ta para pa
e temibel banda kriminal ku
komo base e bario Koraal
Specht Kòrsou. Nan ta rekonosé
komo un grupo di kriminal
peligroso. Na Kòrsou nòmber
di NLS a kai den diferente kaso
di asesinato.
Segun e siudadano ku a
pone Extra na altura di loke tin
skirbí na Antriol riba e edifisio
di LWV, ta bon pa tuma e
situashon aki na serio i buska
pa sa si ta di bèrdat e hendenan
ei ta aki òf simplemente a
skirbi algu ku ta referí na e
grupo.
Último tempu aki por tuma
nota ku kriminalidat a bira
duru na Boneiru. Tin indikashon
ku tin hopi arma di
kandela den sirkulashon. Tin
algun atrako i asesinato ku a
tuma lugá ku sigur ta yama
atenshon riba e isla.