WILLEMSTAD.- ‘Mi ta di akuerdo ku aki un par di aña nos lo tin ku yega einan, esaki si bo ke pa e industria krese, dje forma ei e músiko òf kreadónan por haña rekonosementu pa nan arte’, asina Axel Pikero a kuminsá splika ‘DEN E BEMBE’ relashoná ku e kobransa di ‘royalties’ ku e kuminsá hasi na radio emisoranan. ‘Pa bisa bu e bèrdat, ami no a registrá niun di mi piesanan niun kaminda, ta un fout ku mi a hasi semper. Nos tur tin ku profundisá riba e tema, AMAK tin ku hasi un investigashon. Mi ta di akuerdo ku kaminda tin un industria mas grandi ku e tin su parti benefisioso, den nos merkado lokal ora bo saka un piesa nobo, lo bo tin ku paga radio i tv pa promové esaki pa bo. Esei lo nifiká ku músikonan lo bai hasi mas uso di medionan sosial pa promové nan komposishon. Pasó nan lo no por paga pa promové esaki. No por implementá pa 1e di yüni, falta informashon, pero mi sa ku den un futuro serkano nos lo tin ku bai yega einan. Nos mester evaluá si e proyekto aki ta kumbiní nos komo músiko den un merkado chikí. Un kos si bo mester registrá bo kreashon, bo no sa unda bo arte por yega. Un ehèmpel ta e gritu ‘Tur hende hisa man’, te na Argentina un dj a toka esaki, e tin un benefisio, p’esei ta importante pa kualke kreadó tin nan komposishonnan registrá’, asina Axel Pikero a terminá bisando.