WILLEMSTAD.- Fundashon Kultural Seú Kòrsou ta partisipá ku preparashonnan di hurado ta kla pa ranka sali ku festival Kantadó Mayó 2018 e siman aki, dianan 6, 7, 8 i e final dia 10 di mart awó.
E presidente di hurado aktual ya pa di shete aña manera kustumber a reuní ku partisipantenan pa repasá i aklará e reglamentu di Hurado. Hurado ta enkargá ku e tarea pa evaluá e partisipantenan segun e reglamentu aprobá ku ta trahá  ku e vishon pa mantené e meta kultural di e festival.
Te ainda direktiva ta mantené e prinsipio ku e festival no ta un festival ku énfasis riba e banda ku ta kompañá e kantantenan i ta p'esei ta permití un kantidat limitá di instrumento ku ta respirá e tradishon di tokamentu di seú. Esaki ta prinsipalmente instrumentonan di ritmo manera chapi, wiri, agan, barí, konga i algun instrumento di kuèrdè manera kuarta, kitara i piano.
Tabatin petishon di e areglistanan di sierto grupo, pa por a ekspandé e instrumentonan di kuèrdè ku uso di "keyboard" ku por duna un orkestrashon mas amplio na e banda ku ta kompañá. Ounke direktiva i hurado tin komprenshon pa e  gritu pa modernisashon aki, a disidí pa no introdusí kambio pa e aña aki i entamá un investigashon i diskushon mas a fondo ki kambio lo por trese sin pèrdè e karakter kultural folklóriko di e festival.
Kaminda violá e regla i uza mas instrumento ku esnan permití, hurado lo apliká e sanshon di 20 punto di kastigu pa e partisipante.
Direktiva i hurado ta satisfecho ku e entusiasmo ku ta biba bou di prinsipalmente hóbennan positivo ku ke sigui karga nos kultura.