Norwin “Kapelaan” Martina, strea sobresaliente den Powerlifting

Deporte

Medayista den Kampionato Oropeo i Mundial

WILLEMSTAD.-Norwin "Kapelaan" Martina a nase 24 di mart 1953 na Kòrsou. Norwin ta kapelaan den Sentro di Detenshon i Korekshon na Kòrsou. Tambe e ta instruktor di deporte den prisòn i e ta duna lès i organisá kompetensia entre e prezunan. Norwin no ta un deskonosí den deporte na Kòrsou. E tabata praktiká e deportenan body-building i tambe atletismo huntu ku entre otro e atleta lokal Ruthsel Martina. Despues Norwin a bai biba na Hulanda.

Na Hulanda Norwin a disidí di kuminsá praktiká e deporte di powerlifting i resultado di esaki ta ku el a establesé un rèkòrt pa Hulanda durante Kampionato Oropeo i alabes finalisá komo di 3 di Mundu logrando medaya di bròns. Tabata pa promé biaha den historia di powerlifting ku Hulanda ta logra medaya di bròns den tantu Kampionato Oropeo komo tambe den Kampionato Mundial.

Por poko Norwin a logra poderá di medaya di oro den su kategoria (75 kilo). Sinembargo, kansansio a strob’é. Den estilo di "squad" en total tin tres estilo den powerlifting: squad, bench-press i deadlift.

Kampionato Hulandes:

Na aña 1980 Norwin a partisipá pa promé biaha den Kampionato Hulandes i sali na di dos lugá.

Na 1983 el a bira pa promé biaha kampion di Hulanda den powerlift klase 75 kilo, kompetensia ku a tuma lugá na Dordrecht. El a establesé 3 rèkòrt hulandes nobo. Ademas el a gana e premio di e mihó powerlifter di Hulanda den tur kategoria.

Kampionato Oropeo i Mundial:

Norwin a partisipá dos bes na Kampionato Oropeo, tantu 1983 i 1987. Na aña 1983, na Finlandia, el a sali na 3er lugá pues bon pa medaya bròns.

Norwin a partisipá 4 biaha na Kampionato Mundial: 1982, 1984, 1986 i 1987.

Na aña 1982 Norwin a logra hisa 260 kilo den su promé aparishon i den su di dos turno 270 kilo. Sinembargo e hurado a deskualifiká e último, ya ku segun nan Norwin a sak demasiado den rudia. Norwin a nenga di hasi un di tres aparishon, pa motibu ku e tabata ‘total los’ i e mester a warda forsa pa e estilo di deadlift.

Na bench-press Norwin a pusha 160 kilo i 275 kilo pa deadlift, pa e gran total di 695 kilo. Esaki alabes ta un rèkòrt hulandes. E no a bai purba pa oro pa motibu ku e tabata sa ku e no por a bai mas. Ku esaki, un biaha mas un yu di Kòrsou ta saka kara dignamente den deporte na Hulanda i Oropa.

Logronan:

- 6x Kampion di Hulanda den Powerlift.

- 1980 2do lugá Kampionato Hulanda den klase 75 kilo.

- 1982 Medaya di bròns na Kampionato Mundial na München.

- 1983 Kampion di Hulanda klase 75 kilo.

- 1983 Premio mihó powerlifter di Hulanda den tur kategoria.

- 1983 Medaya di bròns durante Kampionato Oropeo na Finlandia.

- 1984 Kampion di Hulanda.

- 1984 Kampion di Liga Hulandes meet.

- 1985 Kampion di Hulanda.

- 1986 Kampion di Hulanda.

- 1989 Kampion di Hulanda.